സംഭവത്തിന് പിന്നാലെ വിമാനത്തിൽ വിശദമായ സാങ്കേതിക പരിശോധന നടത്തും.
കൊച്ചി: കൊച്ചിയിൽ നിന്ന് അബുദാബിയിലേക്ക് പുറപ്പെട്ട എയർ ഇന്ത്യ എക്സ്പ്രസ് വിമാനം സാങ്കേതിക തകരാറിനെ തുടർന്ന് കൊച്ചി വിമാനത്താവളത്തിൽ അടിയന്തരമായി തിരിച്ചിറക്കി. (സെപ്റ്റംബർ 7) സർവീസ് നടത്തിയ IX 415 വിമാനമാണ് യാത്രാമധ്യേ തിരിച്ചെത്തിയത്.
ബോയിങ് 737 വിമാനം ടേക്ക് ഓഫിന് ശേഷം ഏകദേശം 50 മിനിറ്റ് കഴിഞ്ഞപ്പോൾ 36,000 അടി ഉയരത്തിൽ പറക്കുന്നതിനിടെയാണ് എൻജിൻ ഒന്നിലെ ഓയിൽ അളവ് അതിവേഗം കുറയുന്നത് പൈലറ്റുമാരുടെ ശ്രദ്ധയിൽപ്പെട്ടത്. സാഹചര്യം വിലയിരുത്തിയ ശേഷം അബുദാബിയിലേക്കുള്ള യാത്ര തുടരുന്നത് സുരക്ഷിതമല്ലെന്ന് തീരുമാനിച്ച് വിമാനം കൊച്ചിയിലേക്ക് തിരിച്ചുവിടുകയായിരുന്നു.
ഓയിൽ അളവ് തുടർന്നും കുറഞ്ഞതോടെ എൻജിന്റെ ഓയിൽ പ്രഷർ അപകടനിലയിലെത്തിയതായി റിപ്പോർട്ടുകളുണ്ട്. തുടർന്ന് പൈലറ്റുമാർ എൻജിൻ ഒന്ന് ഓഫ് ചെയ്താണ് വിമാനം കൊച്ചിയിലേക്ക് തിരിച്ചെത്തിച്ചത്. വിമാന ജീവനക്കാർ അടിയന്തര സാഹചര്യത്തിൽ ഉപയോഗിക്കുന്ന FORDEC എന്ന തീരുമാനമെടുക്കൽ നടപടിക്രമവും പിന്തുടർന്നതായി റിപ്പോർട്ടുകൾ പറയുന്നു.
വിമാനം സുരക്ഷിതമായി കൊച്ചി അന്താരാഷ്ട്ര വിമാനത്താവളത്തിൽ ലാൻഡ് ചെയ്തു. യാത്രക്കാർക്കും ജീവനക്കാർക്കും പരുക്കേറ്റതായി റിപ്പോർട്ടില്ല. സംഭവത്തിന് പിന്നാലെ വിമാനത്തിൽ വിശദമായ സാങ്കേതിക പരിശോധന നടത്തും.
യാത്രാമധ്യേ എൻജിനിൽ ഉണ്ടായ പ്രശ്നം ഗുരുതരമാകുന്നതിന് മുമ്പ് തിരിച്ചിറങ്ങാനുള്ള പൈലറ്റുമാരുടെ തീരുമാനം വിമാനത്തിന്റെ സുരക്ഷിതമായ ലാൻഡിംഗിന് സഹായകമായി. സംഭവത്തിന്റെ കൃത്യമായ സാങ്കേതിക കാരണം പരിശോധന പൂർത്തിയായ ശേഷമേ വ്യക്തമാകൂ.