അബുദാബി: ഹോർമുസ് കടലിടുക്കിലെ സംഘർഷവും ഗതാഗത തടസ്സങ്ങളും തുടരുന്നതിനിടെ, ഊർജ കയറ്റുമതിയിലും വ്യാപാരത്തിലും ഹോർമുസിനോടുള്ള ആശ്രിതത്വം കുറയ്ക്കാനുള്ള നടപടികൾ വേഗത്തിലാക്കി യുഎഇ. രാജ്യത്തിന്റെ ഊർജ കയറ്റുമതിയും വ്യാപാര-സാമ്പത്തിക പ്രവർത്തനങ്ങളും പ്രാദേശിക സംഘർഷങ്ങളുടെ പേരിൽ തടസ്സപ്പെടാതിരിക്കാനാണ് ബദൽ മാർഗങ്ങൾ വികസിപ്പിക്കുന്നത്.
യുഎഇയുടെ കിഴക്കൻ തീരത്തെ തുറമുഖങ്ങളുടെ ശേഷി വർധിപ്പിക്കൽ, പൈപ്പ്‌ലൈൻ ശൃംഖല ശക്തിപ്പെടുത്തൽ, റെയിൽവേ ബന്ധങ്ങൾ വികസിപ്പിക്കൽ, ചരക്ക് ഗതാഗതത്തിനായി ബദൽ വ്യാപാര ഇടനാഴികൾ ഒരുക്കൽ തുടങ്ങിയ പദ്ധതികൾക്ക് വേഗം കൂട്ടിയതായി യുഎഇ പ്രസിഡന്റ്‌ിന്റെ നയതന്ത്ര ഉപദേഷ്ടാവ് അൻവർ ഗർഗാഷ് വ്യക്തമാക്കി.
അബുദാബിയിൽ നടന്ന ഹിലി ഫോറത്തിൽ സംസാരിക്കുകയായിരുന്നു ഗർഗാഷ്. നിലവിലെ പ്രതിസന്ധിയിൽ നിന്ന് പാഠങ്ങൾ ഉൾക്കൊണ്ട് മുൻകൂട്ടിയുള്ള ആസൂത്രണവും വേഗത്തിലുള്ള നടപ്പാക്കലുമാണ് യുഎഇ സ്വീകരിക്കുന്നതെന്ന് അദ്ദേഹം പറഞ്ഞു. രാജ്യത്തിന്റെ ഊർജ കയറ്റുമതിയും വ്യാപാര പ്രവർത്തനങ്ങളും തടസ്സങ്ങൾക്ക് “ബന്ദിയാകില്ല” എന്ന നിലപാടും അദ്ദേഹം വ്യക്തമാക്കി.
ഹോർമുസ് കടലിടുക്കിലൂടെയുള്ള ഗതാഗതം സംഘർഷത്തെ തുടർന്ന് ബാധിക്കപ്പെട്ട സാഹചര്യത്തിലാണ് യുഎഇയുടെ നീക്കം. ലോകത്തിലെ പ്രധാന ഊർജ ഗതാഗത പാതകളിലൊന്നായ ഹോർമുസിലെ അനിശ്ചിതത്വം ഗൾഫ് രാജ്യങ്ങളുടെ കയറ്റുമതി സംവിധാനങ്ങളുടെ ദൗർബല്യങ്ങൾ തുറന്നുകാട്ടിയിട്ടുണ്ട്.
കൂടുതൽ പ്രാധാന്യം: ഹോർമുസിന് പകരം കിഴക്കൻ തീരത്തെ തുറമുഖങ്ങളും കരമാർഗങ്ങളും ഉപയോഗിക്കുന്നതിനുള്ള ശേഷി വർധിപ്പിക്കുന്നത് ഭാവിയിൽ യുഎഇയുടെ ഊർജ സുരക്ഷയ്ക്കും വ്യാപാര തുടർച്ചയ്ക്കും നിർണായകമാകുമെന്നാണ് വിലയിരുത്തൽ.(റോയിട്ടേഴ്സ്)