പാലക്കാട് സി.പി.എം ജില്ലാ സെക്രട്ടറി സ്ഥാനത്ത് മാറ്റം. ഇ.എൻ. സുരേഷ് ബാബുവിന് പകരം മുൻ എം.എൽ.എ വി. ചെന്താമരാക്ഷൻ പുതിയ ജില്ലാ സെക്രട്ടറിയായി ചുമതലയേറ്റു.
പാലക്കാട്: സി.പി.എം പാലക്കാട് ജില്ലാ സെക്രട്ടറി സ്ഥാനത്ത് മാറ്റം. ഇ.എൻ. സുരേഷ് ബാബുവിന് പകരം മുൻ എം.എൽ.എ വി. ചെന്താമരാക്ഷനെ പുതിയ ജില്ലാ സെക്രട്ടറിയായി തെരഞ്ഞെടുത്തു. സംസ്ഥാന സെക്രട്ടറി എം.വി. ഗോവിന്ദൻ പങ്കെടുത്ത ജില്ലാ സെക്രട്ടേറിയറ്റ് യോഗത്തിലാണ് നേതൃമാറ്റത്തിന് തീരുമാനമായത്. തുടർന്ന് ചേർന്ന വിപുലീകൃത ജില്ലാ കമ്മിറ്റി യോഗവും തീരുമാനം അംഗീകരിച്ചു.
സമ്മേളന കാലയളവിലല്ലാതെ ജില്ലാ സെക്രട്ടറിയെ മാറ്റുന്നത് അപൂർവമായ നടപടിയായതിനാൽ പാലക്കാട്ടെ നേതൃമാറ്റം രാഷ്ട്രീയ ശ്രദ്ധ നേടിയിട്ടുണ്ട്. നിയമസഭാ തിരഞ്ഞെടുപ്പിന് ശേഷമുള്ള പാർട്ടിയുടെ സംഘടനാ വിലയിരുത്തലുകളുടെയും തിരുത്തൽ നടപടികളുടെയും പശ്ചാത്തലത്തിലാണ് മാറ്റമെന്ന റിപ്പോർട്ടുകൾ പുറത്തുവന്നിരുന്നു. വിഭാഗീയതയും സംഘടനാ പ്രശ്നങ്ങളും സംബന്ധിച്ച് ജില്ലാ നേതൃത്വത്തിനെതിരെ വിമർശനങ്ങൾ ഉയർന്നതായും റിപ്പോർട്ടുകളുണ്ട്.
അതേസമയം, വ്യക്തിപരമായ കാരണങ്ങളാലാണ് ജില്ലാ സെക്രട്ടറി സ്ഥാനത്തുനിന്ന് മാറിയതെന്ന് ഇ.എൻ. സുരേഷ് ബാബു വ്യക്തമാക്കി. വിപുലീകൃത ജില്ലാ കമ്മിറ്റി യോഗത്തിന് മുമ്പ് തന്റെ വ്യക്തിപരമായ അസൗകര്യം നേതൃത്വത്തെ അറിയിച്ചിരുന്നുവെന്നും അദ്ദേഹം പറഞ്ഞു. തന്റെ മാറ്റത്തിന് മറ്റ് വ്യാഖ്യാനങ്ങളുടെ ആവശ്യമില്ലെന്നും സുരേഷ് ബാബു പ്രതികരിച്ചു.
തന്റെ പേര് നിർദേശിച്ചതും പുതിയ ജില്ലാ സെക്രട്ടറി വി. ചെന്താമരാക്ഷനെ ആയിരുന്നുവെന്നും സുരേഷ് ബാബു പറഞ്ഞു. ചെന്താമരാക്ഷൻ തനിക്കേക്കാൾ ശക്തനായ ജില്ലാ സെക്രട്ടറിയായി മാറുന്ന കാഴ്ച ഭാവിയിൽ കാണാമെന്നും അദ്ദേഹം പ്രതികരിച്ചു.
സുരേഷ് ബാബുവിനെതിരെ പരാതികളൊന്നും ലഭിച്ചിട്ടില്ലെന്നാണ് പുതിയ ജില്ലാ സെക്രട്ടറി വി. ചെന്താമരാക്ഷന്റെ വിശദീകരണം. സ്ഥാനമാറ്റത്തിന് പിന്നിൽ മറ്റ് വ്യാഖ്യാനങ്ങൾ നൽകേണ്ടതില്ലെന്നും സുരേഷ് ബാബുവിന്റെ വ്യക്തിപരമായ കാര്യം സംസ്ഥാന നേതൃത്വത്തിനും ബോധ്യപ്പെട്ടിരുന്നുവെന്നും അദ്ദേഹം പറഞ്ഞു.
അതേസമയം, ജില്ലാ നേതൃത്വത്തിനെതിരെ വിഭാഗീയത കൈകാര്യം ചെയ്യുന്നതിലെ വീഴ്ച ഉൾപ്പെടെയുള്ള വിമർശനങ്ങൾ പാർട്ടി യോഗങ്ങളിൽ ഉയർന്നതായി വിവിധ റിപ്പോർട്ടുകളുണ്ട്. എന്നാൽ ഇത്തരം ആരോപണങ്ങളാണ് സ്ഥാനമാറ്റത്തിന് നേരിട്ടുള്ള കാരണമെന്ന് സി.പി.എം നേതൃത്വം ഔദ്യോഗികമായി സ്ഥിരീകരിച്ചിട്ടില്ല.
നിയമസഭാ തിരഞ്ഞെടുപ്പിന് ശേഷമുള്ള സംഘടനാ വിലയിരുത്തലുകളും പാർട്ടിക്കുള്ളിലെ വിവിധ വിഷയങ്ങളും ചർച്ചയായ സാഹചര്യത്തിലാണ് ചെന്താമരാക്ഷൻ ജില്ലാ സെക്രട്ടറി സ്ഥാനമേറ്റെടുക്കുന്നത്. സംഘടനാ ഏകോപനം ശക്തിപ്പെടുത്തുകയും തിരഞ്ഞെടുപ്പ് തിരിച്ചടിക്ക് ശേഷമുള്ള പ്രവർത്തനങ്ങൾ ഏകോപിപ്പിക്കുകയും ചെയ്യുക എന്നതാണ് പുതിയ നേതൃത്വത്തിന് മുന്നിലുള്ള പ്രധാന ചുമതലകളിലൊന്ന്.