ദോഹ: സൗദി അറേബ്യയിൽ സെപ്റ്റംബർ 23 മുതൽ ആരംഭിക്കുന്ന ഗൾഫ് കപ്പ് ഫുട്ബോൾ പോരാട്ടത്തിനുള്ള ഖത്തർ ടീമിൽ മലയാളി യുവതാരം തഹ്‌സിൻ മുഹമ്മദ് ജംഷീദും ഇടംപിടിച്ചു.
ഖത്തർ ദേശീയ ടീമിൽ തഹ്‌സിന് ലഭിച്ച അവസരം പ്രവാസി മലയാളി സമൂഹത്തിനും അഭിമാനമായി.
ദോഹയിൽ ജനിച്ച തഹ്‌സിൻ കണ്ണൂർ സ്വദേശികളായ മലയാളി മാതാപിതാക്കളുടെ മകനാണ്. പിതാവ് ജംഷീദ് തലശ്ശേരി സ്വദേശിയും മാതാവ് ഷൈമ വളപട്ടണം സ്വദേശിയുമാണ്. ഖത്തറിലെ അൽ ദുഹൈൽ ക്ലബ്ബിലൂടെ ഫുട്ബോൾ രംഗത്ത് വളർന്ന തഹ്‌സിൻ വിങ്ങറായാണ് കളിക്കുന്നത്.
ഖത്തറിന്റെ വിവിധ പ്രായവിഭാഗങ്ങളിലുള്ള ദേശീയ ടീമുകളിൽ കളിച്ച പരിചയവുമായാണ് താരം സീനിയർ ടീമിൽ ഇടംനേടുന്നത്. ഖത്തർ ഫുട്ബോളിൽ ഇന്ത്യക്കാരനായ താരമെന്ന നിലയിലും തഹ്‌സിൻ ശ്രദ്ധേയനാണ്.
ഗൾഫ് കപ്പിൽ ഖത്തറിനായി കളത്തിലിറങ്ങാൻ ഒരുങ്ങുന്ന തഹ്‌സിന്റെ പ്രകടനത്തിനായി കാത്തിരിക്കുകയാണ് മലയാളി ഫുട്ബോൾ ആരാധകർ. ഖത്തറിന്റെ ദേശീയ ജേഴ്സിയിൽ മലയാളി താരം കളിക്കാനെത്തുന്നത് പ്രവാസി സമൂഹത്തിനും ആവേശം പകരുന്നു.