മിൽപീറ്റസ്: കാലിഫോർണിയയിൽ രണ്ട് മലയാളി യുവതികൾ കൊല്ലപ്പെട്ട സംഭവത്തിൽ അന്വേഷണം നിർണായക ഘട്ടത്തിൽ. തൃശൂർ മുടിക്കോട് സ്വദേശിനി അഞ്ജന ഹരി (35), തിരുവനന്തപുരം കേശവദാസപുരം സ്വദേശിനി ആൻ മേരി മാത്യു (40) എന്നിവരാണ് കൊല്ലപ്പെട്ടത്. അഞ്ജനയുടെ കൊലപാതകത്തിൽ കോട്ടയം സ്വദേശിനി അനില ബേബി (32) അറസ്റ്റിലായി. അനിലയ്ക്കെതിരെ കൊലപാതകക്കുറ്റം ഔദ്യോഗികമായി ചുമത്തിയിട്ടുണ്ട്.
ഓഗസ്റ്റ് 28ന് മിൽപീറ്റസിലെ മിൽ ക്രീക്ക് അപാർട്മെന്റ് സമുച്ചയത്തിലാണ് അഞ്ജനയെ എസ്‌യുവി ഇടിച്ചുകൊലപ്പെടുത്തിയതെന്നാണ് പൊലീസ് ആരോപണം. അഞ്ജന വാഹനത്തിനടുത്തേക്ക് നടന്നെത്തുന്നതിനിടെ അനില ഓടിച്ചിരുന്ന വാഹനം മനഃപൂർവം ഇടിച്ചുകയറ്റിയെന്നാണ് അന്വേഷണ ഉദ്യോഗസ്ഥരുടെ കണ്ടെത്തൽ. ഇടിയുടെ ആഘാതത്തിൽ അഞ്ജനയ്ക്ക് ഗുരുതരമായ പരുക്കേറ്റു. വാഹനത്തിന്റെ മുൻഭാഗത്ത് വലിയ കേടുപാടുകളും രക്തക്കറകളും കണ്ടെത്തിയതായി പൊലീസ് രേഖകളിൽ പറയുന്നു. സംഭവസ്ഥലത്ത് ബ്രേക്കിന്റെ അടയാളങ്ങളില്ലെന്നതും അന്വേഷണം ആസൂത്രിത ആക്രമണമെന്ന സംശയത്തിലേക്ക് നയിച്ചു.
California Penal Code 187(a) പ്രകാരമാണ് അനിലയ്ക്കെതിരെ കൊലക്കുറ്റം ചുമത്തിയിരിക്കുന്നത്. മുൻകൂട്ടിയുള്ള ദുരുദ്ദേശത്തോടെയാണ് ആക്രമണം നടത്തിയതെന്നും അതിക്രൂരമായ രീതിയിലാണ് കൊലപാതകം നടന്നതെന്നും പ്രോസിക്യൂഷൻ ആരോപിക്കുന്നു. എന്നാൽ ഇവ നിലവിൽ കോടതിയിൽ തെളിയിക്കപ്പെടേണ്ട ആരോപണങ്ങളാണ്; പ്രതി കുറ്റക്കാരിയാണെന്ന് അന്തിമമായി വിധിച്ചിട്ടില്ല.
ഇതിനിടെ സാൻ ജോസിലെ താമസസ്ഥലത്ത് ആൻ മേരി മാത്യുവിനെ കുത്തേറ്റ നിലയിൽ മരിച്ച നിലയിൽ കണ്ടെത്തി. അഞ്ജനയുടെ കൊലപാതകവും ആൻ മേരിയുടെ മരണവും തമ്മിൽ ബന്ധമുണ്ടോയെന്നതാണ് അന്വേഷണത്തിലെ പ്രധാന ചോദ്യം. ആൻ മേരിയുടെ കൊലപാതകത്തിൽ അനിലയുടെ പങ്ക് പൊലീസ് ഇതുവരെ അന്തിമമായി സ്ഥിരീകരിച്ചിട്ടില്ല.
സംഭവത്തിന് തൊട്ടുമുമ്പ് മൂന്ന് സുഹൃത്തുക്കളും ഒരുമിച്ച് ഓണം ആഘോഷിക്കുകയും സിനിമ കാണുകയും ചെയ്തിരുന്നു. മണിക്കൂറുകൾക്കകം രണ്ടുപേർ കൊല്ലപ്പെടുകയും മൂന്നാമത്തെയാൾ കൊലക്കേസിൽ അറസ്റ്റിലാകുകയും ചെയ്തതാണ് സംഭവത്തെ കൂടുതൽ ദുരൂഹമാക്കുന്നത്.
കൊലപാതകങ്ങളുടെ പിന്നിലെ യഥാർഥ പ്രേരണ, ഇരുവരുടെയും മരണങ്ങൾ തമ്മിലുള്ള ബന്ധം, ആൻ മേരിയുടെ കൊലപാതകത്തിൽ അനിലയ്ക്കുള്ള പങ്ക് തുടങ്ങിയ കാര്യങ്ങളിലാണ് അന്വേഷണം ഇപ്പോൾ കേന്ദ്രീകരിക്കുന്നത്.
അനില ബേബിയുടെ അടുത്ത പ്രധാന കോടതി നടപടി സെപ്റ്റംബർ 10ന് നടക്കും. ഫൊറൻസിക് പരിശോധനകളും മറ്റ് അന്വേഷണ നടപടികളും പുരോഗമിക്കുകയാണ്.
രണ്ട് മലയാളി യുവതികളുടെ മരണം. ഒരാൾക്കെതിരെ കൊലക്കുറ്റം. പിന്നിൽ ഒരേ ആസൂത്രണമോ? കാലിഫോർണിയ മലയാളി സമൂഹത്തെ നടുക്കിയ കേസിൽ ഇനി പുറത്തുവരാനുള്ളത് നിർണായക തെളിവുകളാണ്.