കാസർകോട് മുതൽ തിരുവനന്തപുരത്തേക്ക് ദീപശിഖാ പ്രയാണം; കളമശേരിയിൽ നിന്ന് കലൂർ സ്റ്റേഡിയത്തിലേക്ക് മാരത്തൺ
പൊതുസമ്മേളനം മന്ത്രി റോജി എം. ജോൺ ഉദ്ഘാടനം ചെയ്യും
‘Yes to Sports, No to Drugs’
കൊച്ചി: ലഹരി ഉപയോഗത്തിനെതിരെ ശക്തമായ ബോധവൽക്കരണം ലക്ഷ്യമിട്ട് കേരള പൊലീസ് സംഘടിപ്പിക്കുന്ന ‘ലഹരിക്കെതിരെ കായിക ലഹരി’ മെഗാ മാരത്തൺ ഇന്ന് കൊച്ചിയിൽ. 47-ാമത് കേരള പൊലീസ് സ്റ്റേറ്റ് അത്‌ലറ്റിക് ആൻഡ് ഗെയിംസ് മീറ്റിന്റെ ഭാഗമായാണ് പരിപാടി സംഘടിപ്പിക്കുന്നത്. ‘Yes to Sports, No to Drugs’ എന്ന സന്ദേശമാണ് പരിപാടിയുടെ പ്രധാന ആശയം.
കാസർകോട് പുതിയ ബസ് സ്റ്റാൻഡ് പരിസരത്ത് നിന്ന് ആരംഭിച്ച ദീപശിഖാ പ്രയാണം വിവിധ ജില്ലകളിലൂടെ സഞ്ചരിച്ചാണ് കൊച്ചിയിലെത്തുന്നത്. സെപ്റ്റംബർ 6ന് വൈകിട്ട് നാലോടെ കളമശേരി ഡെക്കാത്തലണിന് സമീപം ദീപശിഖ എത്തും. തൃക്കാക്കര എസിപി ബിജോയ് ചന്ദ്രൻ ദീപശിഖ ഏറ്റുവാങ്ങും. തുടർന്ന് ഫ്ലാഷ് മോബ്, സൂംബാ ഡാൻസ് തുടങ്ങിയ പരിപാടികളും നടക്കും.
കളമശേരിയിൽ നിന്ന് കലൂരിലേക്ക്
കളമശേരിയിൽ നിന്ന് സൈക്കിൾ റാലിയുടെയും മാരത്തണിന്റെയും അകമ്പടിയോടെ ദീപശിഖ കലൂർ ജവഹർലാൽ നെഹ്റു സ്റ്റേഡിയം ഗ്രൗണ്ടിലേക്ക് എത്തിക്കും. വൈകിട്ട് അഞ്ചോടെ നഗരത്തിന്റെ വിവിധ ഭാഗങ്ങളിൽ നിന്നുള്ള മാരത്തൺ സംഘങ്ങളും ഇവിടെ സംഗമിക്കും. തുടർന്ന് സ്റ്റേഡിയം വലംവെച്ചുള്ള പരിപാടികളും പൊതുസമ്മേളനവും നടക്കും.
പൊതുസമ്മേളനം മന്ത്രി റോജി എം. ജോൺ ഉദ്ഘാടനം ചെയ്യും. കൊച്ചി സിറ്റി പൊലീസ് കമ്മിഷണർ കാളിരാജ് മഹേഷ് കുമാർ ദീപശിഖ ഏറ്റുവാങ്ങും.
കൊച്ചിയിൽ ഗതാഗത നിയന്ത്രണം
മാരത്തണിന്റെയും ദീപശിഖാ പ്രയാണത്തിന്റെയും ഭാഗമായി കളമശേരി മുതൽ കലൂർ സ്റ്റേഡിയം വരെയുള്ള റോഡുകളിൽ വൈകിട്ട് 3 മുതൽ 7 വരെ ഭാഗിക ഗതാഗത നിയന്ത്രണം ഏർപ്പെടുത്തിയിട്ടുണ്ട്.
NH 544, ആലുവ–എറണാകുളം പി.ഡബ്ല്യു.ഡി റോഡ്, കലൂർ ജവഹർലാൽ നെഹ്റു സ്റ്റേഡിയം പരിസരം എന്നിവിടങ്ങളിലാണ് നിയന്ത്രണം. യാത്രക്കാർ സാധ്യമെങ്കിൽ ബദൽ റോഡുകൾ ഉപയോഗിക്കണമെന്ന് പൊലീസ് നിർദേശിച്ചിട്ടുണ്ട്.
സെപ്റ്റംബർ 8 മുതൽ സംസ്ഥാന പൊലീസ് കായികമേള
കേരള പൊലീസ് സ്റ്റേറ്റ് അത്‌ലറ്റിക് ആൻഡ് ഗെയിംസ് മീറ്റ് സെപ്റ്റംബർ 8 മുതൽ 10 വരെ തിരുവനന്തപുരത്താണ് നടക്കുന്നത്. സംസ്ഥാനത്തെ വിവിധ പൊലീസ് ജില്ലകളിൽ നിന്നും പ്രത്യേക യൂണിറ്റുകളിൽ നിന്നുമായി ഏകദേശം 2,000 പൊലീസ് ഉദ്യോഗസ്ഥർ പങ്കെടുക്കും. ചന്ദ്രശേഖരൻ നായർ സ്റ്റേഡിയത്തിലും യൂണിവേഴ്സിറ്റി സ്റ്റേഡിയത്തിലുമാണ് മത്സരങ്ങൾ.
ലഹരിക്കെതിരെ യുവാക്കളിലും പൊതുസമൂഹത്തിലും കായിക സംസ്കാരം വളർത്തുക എന്ന ലക്ഷ്യത്തോടെ നടത്തുന്ന പരിപാടി, പൊലീസ് സേനയുടെ കായികക്ഷമതയ്ക്കൊപ്പം സാമൂഹിക ബോധവൽക്കരണത്തിനും പ്രാധാന്യം നൽകുന്നതാണ്.